Keçən bir əsr ərzində vəhy diyarında çox acı bir hadisə baş vermiş və müsəlmanları həmişəlik olaraq islamın tarixi əsərlərindən məhrum etmişlər. Bu da vəhhabilərin güclənməsi idi. Təqribən 80 il əvvəl (1344-cü h.q) vəhhabilər Hicazda hakimiyyətə çatdıqları zaman ölçülməmiş, eyni zamanda həmahəng bir hərəkətlə bütün islami və tarixi abidələri «şirk və bid’ət» bəhanəsi ilə dağıdaraq yerlə yeksan etdilər.
Amma Rəsuli-Əkrəm (səlləllahu əleyhi və alih)-in mütəhhər qəbrini dağıtmağa cür’ət etmədilər. Çünki bütün dünya müsəlmanlarının onların əleyhinə qalxması ehtimalı var idi. Başqa sözlə desək, təqiyyənin müxalifləri olan bu qrup digər müsəlmanlardan təqiyyə etdilər!
Beytullahil-hərama etdiyim ziyarət səfərlərinin birində onların böyükləri ilə dostcasına söhbət aparırdım. Nə üçün bütün qəbirlərin dağıdıldığı, amma Peyğəmbəri-Əkrəm (səlləllahu əleyhi və alih)-in qəbrinin salamat qalmasını soruşduqda, heç bir cavab vermədilər.
Hər bir halda, xalqların həyatı müxtəlif məsələlərlə tam mə’nada bağlıdır. Onlardan biri də özlərinin dini, mədəni, elmi miraslarını qoruyub-saxlamaqdan ibarətdir. Çox təəssüflə qeyd etmək lazımdır ki, müsəlmanların düzgün tədbir tökməməsi nəticəsində vəhy diyarı, xüsusilə Məkkə və Mədinə, bir qrup geridə qalmış, qansız və təəssübkeş insanın əlinə düşdü, onlar islam mədəniyyətinin ən nəfis və dəyərli miraslarını həddindən artıq puç və əsassız bəhanələrlə məhv edib dağıtdılar. Bu mirasların hər biri iftixarlı islam tarixinin mühüm bir hissəsini xatirələrdə canlandırırdı.
Təkcə «Bəqi» qəbiristanlığında dəfn olunan böyük şəxsiyyətlərin və imamların qəbrini deyil, üstəlik islam tarixindən yadigar qalan hər növ dəyərli əsərləri də məhv edib aradan apardılar, müsəlmanlara bərpaolunmaz xəsarətlər vurdular. Bu tarixi əsərlər çox qəribə cazibədarlığa malik idi və insanı islam tarixinin dərinliklərinə aparıb seyr etdirirdi.
Bir gün əzəmətli mənzərəyə malik olan, hər bir guşəsi tarixi hadisələrin mühüm bir hissəsini özündə əks etdirən «Bəqi» qəbiristanlığı bu gün çöllüyə çevrilmiş və özünə çox pis bir mənzərə almışdır, özü də çox gözəl otellərin və bərli-bəzəkli binaların arasında! Onun qəvarəsi olmayan dəmir qapıları gün ərzində yalnız iki saat zairlərin üzünə açılır, o da yalnız kişilərin!